أهلاً أنا ديما ، من الناس اللي يشدّهم جدًا شكل المنتجات و تغليفها و طريقة تصميم الشعار لكل منتج ، و عادي جداً اشتري منتج بس لأني انبهرت بالتصميم ! و هالشيء ينطبق أيضاً على طريقة عرض المواقع، لدرجة بعضها ما ودي أطلع منها أبدًا .
دايم كان عندي فضول أو نقدر نقول رغبة اني اصمم موقع أو تطبيق و يصير شكله جذّاب مره زي اللي الأشياء اللي تجذب عيني، بس المشكلة كانت اني ما أدري أسوي موقع ايش بالضبط و كلما فكرت ابدأ أهوّن عشان هذي الحجة العبيطة .
تم إنقاذي من هذي المعمعة بعد ما اقترح خالي عبدالرحمن – المبرمج الرهيب – اننا نبدأ نسوي مشاريع نتعلم فيها الأشياء المهمة ولو كانت مو بمنهجنا الدراسي، مره تحمست للفكرة لأني أدري راح استفيد منها كثير و أهم شيء راح أحس بالإنجاز !
و هنا يكون عندك امتياز أيها القارئ بمعرفة نوع المشروع الأول وهو “تصميم موقع شخصي”
وهذي هي أهم النقاط اللي لاحظتها خلال هذي الرحلة الممتعة :
*اتبع الطريقة اللي تناسبك : طريقتي بالتعلم كانت اني افتح المواقع اللي تصميمها يشدّ و آخذ اللي يعجبني منها و ابدأ أبحث عن كل خطوة بشكل منفصل و اطبقها مباشرة على موقعي بالـ html و css ، مع أنه المتعارف عليه المفروض نبدأ بالأساس html و بعدها css لكن لا بأس بتغيير الطريقة شوي لأني كنت عارفة اني لو ما مشيت كذا راح أملّ منه بسرعة و ما أكمله .
*لو كنت داخل دائرة مفرغة من كثرة الأخطاء ، وقف و ارجع له بعدين : اذكر لما سويت القائمة للصفحة الرئيسية كنت ابيها بشكل معيّن و كل ما حاولت و طبقت نفس اليوتيوب بالضبط يطلع فيه خطأ بالقائمة المنسدلة ! مره كنت مركزة بالمشكلة الى ما بديت أعصب منها ليه ما تضبط ؟
سكرت اللابتوب و رجعت له اليوم اللي بعده ، بدأت تطلع القائمة لكن مو بالترتيب اللي أبيه ، سكرت اللابتوب و رجعت له من بكرا وهكذا الى ما ضبط .
صح إني كنت اشتغل على شيء واحد لكن كان عندي كأنه كل الموقع من كمية القهر لأنه مو قاعد يشتغل زي ما أبي، الجميل بالموضوع ان عدد المرات اللي كان ما يضبط فيها و كنت احوس فيه على فترات قسّمت الضغط النفسي والإحساس بالعجز بحيث انه ما كان يأثر علي زي لما قعدت احاول اضبطه بوقت واحد .
*مو لازم كل شيء يكون بيرفكت : وأنا في خضم الحرب مع القائمة للموقع تخليت عن اشياء كثير كان ودي أسويها عشان ما أثقل على نفسي و أترك الشغل بسرعة ، لأني كنت – مثل ما ذكرت سابقاً – مره مهتمة بالتصميم أبيه يطلع شيء واو ، وأنا كنت إلى الآن ما بعد بديت أتعلم باقي الاشياء الثانية مثل Java script مع انها مره بتفرق بطريقة ظهور الموقع .. فـ آخر شيء اقتنعت اني راح أكمل الموقع مثل ما هو مو لازم يوصل للشكل النهائي اللي ببالي لكن أهم شيء أني أسلمه بشكل عام مرتب و مريح للعين و أصير كل ما لقيت فرصة أدخل أعدل عليه حبة حبة 🤏🏻
أخيراً ، مره مبسوطة اني بديت بهذي التجربة لأني اكتشفت اني مره أستمتع بتصميم المواقع و البحث عن تصاميم و طرق حلوة لترتيب الكلام و الصور ، و كيف آخذ من مقاطع اليوتيوب الأجزاء اللي أبيها و أطبقها بالطريقة المناسبة لموقعي ، و برضو أحلى شيء انبسطت عليه اللي هو لما يكون فيه شيء معيّن يعجبني بالموقع اسوي له (فحص – inspect) و آخذ الكود منه أحسه شيء رهيب مره !🤣
- استغرق تصميم الموقع قرابة ٦ ساعات من البحث و التطبيق و المتعة أكيد ✨
- شكراً لوصولك إلى هنا و مشاركتي تجربتي الأولى في التدوين و تصميم المواقع 🥳