مين قال دورة برمجية للمبتدئين ؟

من زمان وأنا عندي رغبة عارمة إني أعطي دورة بشيء معين ، بس المشكلة اني ما ادري وش راح يكون بالضبط ، و أعتقد بعد قراءة ثلاث تدوينات لي تقدر تعرف إن الأكيد إني ما ابيها تكون خرابيط أو شيء أي كلام وبس !

رغبتي هذي زادت بعد ما دخلت تخصصي أكثر و أكثر ، و بعد ما عرفت أو اكتشفت شغفي المُخبأ لكتابة السطور البرمجية و حل المشاكل ، و فرحة الانتصار في معركة ضد الأخطاء اللانهائية بعد دوامة من الزعل و الحلول اللي تجي بنص نومتي .

متأكدة إن أي شخص جرب البرمجة يعرف شعور فرحة كتابة أول سطر برمجي ، التعديل الأربعين اللي اشتغل بعده برنامج كان شوي و ينفجر من كمية الأخطاء ، و لما يشتغل كود كتبه بطريقته الخاصة بدال الموجود بالسلايدات ، زر Run لما يضغطه و يشتغل صح من أول مره ، اصطياد السطر اللي مسبب مشكلة من بين سطور عديدة ، كلها تحسسنا بشعور تحقيق انجاز صغير بكل مره ! 🥳

هذا الشيء اللي زاد فيني رغبتي الأولى في إلقاء دورة ، و هذا الشعور المبهر بالذات كان هو أكثر شيء ودي أنشره و أبين للناس ايش هي البرمجة ؟

من هنا وقع الاختيار على لغة بايثون كبداية لبساطتها للمبتدئين و سهولتها بالتعلم ، قصدت ما أختار لغة صعبة أو فيها قواعد كثير عشان يكون التركيز على تجربة البرمجة أكثر من أي شيء ثاني ، و أيضاً لأني كنت بتعلمها قبل أعلمها البنات ، وما أخذ مني وقت تعلمت الأساسيات من هذا فيديو الفنان اختصر علي كثير ، و أيضاً حرصت انها تكون على منصة Replit – لمعلومات أكثر عنها اقرأ هذي التدوينة –  عشان ما نمر بمشاكل تتعلق بالتحميل و اختلاف الأنظمة خصوصاً مع ضيق الوقت .

الدورة قررت انها تكون بعنوان ” Code your dreams ” و موجهة لطالبات المرحلة الثانوية  أقمتها برفقة ريـمـا ، عبارة عن يومين ناخذ فيها أساسيات البايثون و تنتهي ببناء كل بنت لعبة التخمين و تقدر كل وحدة منهم تعدل عليها بالنهاية مثل ما تحب ، ركزنا انها لازم تنتهي بلعبة حتى يقدرون البنات يلعبونها صديقاتهم و أهلهم و غيره ، لأن هذا كان واحد من أهم الأشياء بالنسبة لي و هو فرحة مشاركة الآخرين شيء من صنعك الخاص .

خلال رحلتي في صناعة محتوى الدورة من الصفر و حتى وقت تقديمها للبنات ، هذي هي أهم النقاط اللي لاحظت انها أثرت بشكل سلبي أو ايجابي في تفاعلهم معها  :

• عربي او انجليزي ؟

احترت كثير من هالناحية و ما أخفيكم اننا كنا مسوين كل شيء باللغة الإنجليزية بالبداية لأن كان ببالي إنها فرصة يتعلمون المصطلحات من الآن و على اساس الشرح العربي يفي بالغرض ، لكن على آخر اللحظات تراجعت و ترجمت كل شيء الى اللغة العربية لأني تذكرت إن الهدف الأساسي كان اننا نبي كل البنات يفهمون و ما يصير أحد منهم يحس بالضغط من ناحية الفهم ، و الحمدلله كان الخيار الأفضل ! لأن كثير بنات كانت تواجههم مشكلة اللغة بالرغم من حبهم الكبير و رغبتهم القوية لتعلم البرمجة أو دخول تخصص له علاقة بالحاسب ، فهذي النقطة ساعدتهم كثير بإنهم يشوفونه سهل و بسيط و يركزون على الأساس .

• أولاً الطريقة ، بعدها التجربة :

بداية المحتوى أخذ منا وقت صراحة كطريقة عرض و كيف ممكن نبسطه للبنات بأكبر شكل ممكن ، بالحكم ان أغلب المناهج ما ياخذون فيها الا طريقة تركيب اللبِنات ( تشبه الـ puzzle ) فـ ركزنا إن المحتوى يكون يشرح كل مفهوم بشريحة منفصلة سطر سطر ، و يتخلله بعض التمرينات البسيطة لتثبيت المعلومة لا أكثر ، و كان التفاعل ممتاز على التمارين لأنه يثبت للبنت اذا فاهمة أو لا و يولد عندها أسئلة جديدة .

• سهلها عليهم قدر الإمكان :

كنا مسوين ورقة فيها الأساسيات لكتابة كل سطر ( syntax ) لكل شيء راح ناخذه باليومين الخاصة بالدورة ، من باب إنها تكون مرجع للبنات خلال وقت بناء البرنامج بالأخير ، الفكرة كانت إننا نبيهم ما يتشتتون بالحفظ و يركزون على الأساس – اللي هو كتابة الأكواد و مواجهة الأخطاء – و أخذ فكرة أولى إيجابية عن البرمجة ، لكن وقعنا بخطأ صغير وهو اننا ما كتبنا الملاحظات الخاصة بالورقة بالعربي ظناً منا ان كل شيء واضح و مفهوم و الكلمات بسيطة ، لكن للأسف ما كانت واضحة للبنات فما استفادوا منها الاستفادة الي كنا نتوقعها .

*هنا أرفقت ورقة الـ syntax للي حاب يستفيد منها 👩🏻‍💻 .

• قسم الأفكار لأجزاء أصغر :

شيء مفيد جدًا لاحظته خلال هالتجربة ، إن المبتدئين مره يفرق معهم تقبلهم للمعلومة لما تعطيهم كل شيء جميع أو لما تعلمهم إنها مجرد أجزاء صغيرة متفرقة نركبها على بعض عشان تعطينا شيء أكبر ، و هذا المفهوم طبقناه لما جلسنا نتعلم الأجزاء اللي نحتاجها لبناء اللعبة أول ، و حتى لما بدينا ببرمجتها كانت الفكرة الكبيرة مقسمة لخطوات عشان نحل مشاكل الخطوة الأولى قبل ما ننتقل للخطوة اللي بعدها .

• حرّك مخهم بوقت ما يتوقعونه !

هذي الفكرة الحلوة حبيتها خلال دخولي بالمعسكر الأول تبع Side quest ، أنه بعد ما نخلص اليوم الأول و بالوقت الفاضي مساءً ، أرسلنا تحدي سريع للبنات الموجودين بالوقت هذا 🫣

• الهدف الأكبر انهم يطلعون وهم مبسوطين من انفسهم :

بآخر يوم و لما بدينا نبني البرنامج و نركب المفاهيم على بعض ، فيه بنات كانوا ماشين أسرع من الباقين شوي بالفهم و التطبيق ، هالشيء أثر على البعض الآخر من ناحية انهم احبطوا شوي ، وهنا ركزنا على إننا نترك فيهم أثر ايجابي و ذكرى حلوة عن البرمجة ، فمثلاً بدل ما يكون التركيز الأكبر على انهم يعرفون يكتبون بأنفسهم او يستنتجون السطر اللي بعده كانت الطريقة إننا نكتب السطر مثلاً و نسألهم عنه ، وش رايك وش فيه خطأ ؟ ليه طلع كذا ؟ طيب اشرحي لي وش فهمتي ؟ و هكذا ..

• تقديم شهادات إن أمكن :

حرصنا في هذي الدورة إنه تكون فيه شهادات مقدمة من جامعة القصيم عشان يتحمسون البنات أكثر يحضرون ، و ساعدتنا فيهم أ.هاجر الثنيان و أ.زياد السعيد ، و الحمدلله متأكدة إنها كانت عامل مؤثر في عدد البنات اللي حضروا .

جزء من نجاح هذي الدورة بعد الله كان الثانوية السادسة ، المرشدة أ.مشاعل الهذيل ، و أيضاً البنات الـ ١٥ اللي أعطونا من وقتهم و تركيزهم و حضروا الدورة . سعيدة جداً و ممتنة لكل من ساهم في ظهور هذي الدورة بأفضل شكل ممكن ! و سعيدة أكثر كون هذي التجربة تركت أثر حلو عند البنات اللي حضروا وحببتهم بالبرمجة و حققت الهدف اللي كنت أبغى أوصله ✨