في الاسبوع الماضي حضرت معسكر خاص بالذكاء الاصطناعي لمدة ثلاث أيام في جامعتنا – جامعة القصيم – بقيادة طالبين مميزين من الجامعة، ولا أخفي عنكم كمية الحماس المهولة اللي كنت أشعر بها لهذا المعسكر .. فهي فرصة و كنت محظوظة بالحصول عليها و الحمدلله .
في اليومين الأوليّن كان الحديث عن أنواع تعلم الآلة ( Machine learning ) و بعض أنواع الخورزميات التي تستخدم فيها و مثال تطبيقي في كل يوم، حسيت بالبداية بالضياع شوي و هذا شيء طبيعي لأن تقريباً كل اللي كان يُذكر كان جديد علي بحكم اننا في المستوى التاسع – بنظام الثلاث اترام – في تخصص تقنية المعلومات ما أخذنا المادة المتعلقة بالذكاء الاصطناعي، ولكن رغبتي بالتجربة و انبهاري بكيفيه عمل الآلة قضت على شعور إني متأخرة عن الركب و بالعكس زادتني همة و نشاط عشان أتعلم و أطبق .
في اليوم الثالث كان الحديث عن الـ Deep learning و كيفيه عمل ChatGPT مع د.محمد السحيباني وكيل كلية الحاسب، كان لقاء ممتع جدًا و أجاب فيه على تساؤلاتنا الخاصة بالموضوع و أيضاً سمعنا وجهة نظرة بالرأي المنتشر مع انتشار الذكاء الاصطناعي “هل سيقضي ChatGPT على المبرمجين؟” و كان جوابه إن المبرمج لازم ينتبه على نفسه و يتأكد انه ما يكون مبرمج تقليدي ، و يفكر كيف يقدر يستغل مثل هذي التقنيات الجديدة و يواكبها بحيث يستخدمها بطريقة تجعل منه شخص مميز و يتقدم على الذكاء الاصطناعي بخطوة ، و اتفق معه بشدة في هذه النقطة .
اختتم المعسكر بمسابقة تنافسية بين الطلاب اللي حضرو وكان على منصة kaggle لمدة ثلاث أيام، انا وريما كونّا فريق و كنا حاطين ببالنا اننا راح نرفع ملف واحد – بس من باب المشاركة – في أول يوم فقط و باقي الأيام نكمل أشغالنا المعلقة، و ايضاً بحكم إني ما توقعت اصلاً نقدر نسوي اشياء كثيرة ترفعنا بالنقاط مقارنةً بالطلاب اللي آخذين مقدمة بالمادة أو فاهمينها، لكن لعل الحماس و حب التحدي أخذنا معه خصوصاً لما صارت المنافسة قوية على المركز الأول بالمنصة ! و حصل عكس المخطط له تماماً كملنا الى آخر الوقت و استخدمنا كل الفرص المتاحة لرفع الملفات :).
*موضوع التحدي كان عن بيانات فندق و المطلوب هو اننا ندرب الآلة على انها تتوقع اذا الشخص راح يكنسل الحجز أو لا .
و الشيء اللي فرحت فيه و أعتبره انجاز عظيم جدًا هو اننا بعد منافسة شديدة حصلنا على المركز الأول و لله الحمد !🥳
* في تجربتي هذي استمعت كثير و تعلمت أكثر، بكل مره اسأل نفسي هل اسجل بمثل هذي المعسكرات او لا ؟ اتذكر شعوري بعد كل معسكر قد ايش تجدد فيني الحماس و النشاط و الشغف و تغير لي جو الدوام بعدها أجزم أسجل و بالنهاية ما أندم ابدًا .
الشكر لله أولاً ثم للقائمين على مثل هذي المعسكرات في كليتنا ، و بالأخص عميد الكلية الدكتور سليمان السحيباني ، و أكرر شكري للدكتور محمد السحيباني ، و سعود العشرة و خالد الحميدان اللي ما بخلوا علينا بوقتهم و جهدهم و معرفتهم ، الجميع كان جزء من خروج هذا المعسكر لنا بهذي الصورة الثرية و الممتعة، فليس كل معسكر أو دورة تنتهي بمثل هذا الأثر الإيجابي و الحسن على حاضريه إلا إن كان بهذا التنظيم وهذه الجودة ، فالحمدلله على توفيقه و تيسيره 🤍
بعد المعسكر اكتشفت إن مجال تعلم الآلة و الذكاء الاصطناعي مجال شيق و مثير للإهتمام و بإذن الله راح أكمل التعلم و الاستكشاف فيه و أطمح مستقبلاً تنفيذ فكرتي الخاصة بمساعدة الذكاء الاصطناعي لتثبيت المفاهيم بشكل أفضل، و هذا المعسكر ما كان إلا الخطوة الأولى لي في هذا الطريق، و الأكيد اني متحمسة جدًا أدخل منافسات جديدة على kaggle بعد آخر تجربة !🤩